Leoteca - Parte de Smartick

Dentro da súa colección de contos universais, Xerais publica Contos completos de Charles Perrault, volume que pecha esta serie onde se publicaron as versións galegas dos Contos de Andersen, dos Contos de Grimm, dos Contos de Hoffman e dos Contos das 1001 noites. A presente edición dos Contos completos de Charles Perrault foi traducida por Carmén Torres París. Na primeira parte do volume recóllense os contos en verso: “Grisélide” (ilustrado por Paz Rodero), “Pelica de Asno” (ilustrado por Roció Martínez) e “Os desexos ridículos” (ilustrado por Ulises Wensell). Na segunda parte recóllense os chamados “Contos de antano”: “A Bela dormente do bosque” (ilustrado por Teresa Novoa), “Carrapuchiña vermella” (ilustrado por Juan Ramón Alonso), “A Barba azul” (ilustrado por Emilio Urberuaga), “Mestre gato ou o gato con botas” (ilustrado por Arcadio Lobato), “As fadas” (ilustrado por Ana López Escrivá), “A Cinsenta ou O zapatiño de cristal” (ilustrado por Alicia Cañas Cortázar), “Riquete o do copete” (ilustrado por Asun Balzola) e “Polgariño” (ilustrado por Carme Solé i Vendrell). O libro complétase cun fermoso prólogo, titulado “Pagar en peñor”, preparado polo escritor Gustavo Martín Garzo. Os contos de Charles Perrault forman parte do acervo de historias esenciais, fundantes da ficción universal, aquelas que substentan a nosa vida e protexen o noso pensamento; ese repertorio secreto que dunha forma máis ou menos declarada tódalas culturas vense obrigadas a reproducir para constituírense como tales.