Leoteca - Parte de Smartick

A aventura sorprendente dun homiño moi valente é un libro moi especial. Ten un ritmo fascinante, que fai as delicias dos lectores, e resulta tan tolo e disparatado que nos fai rir continuamente. Ademais, é un libro ideado desde unha gran imaxinación, que ás veces bota man das cousas máis absurdas para soprendernos e divertirnos. E conségueo completamente. Trátase dun libro que vai gustar moito aos nenos e nenas. Non só pola orixinalidade desbocada da historia senón tamén polas súas rimas, por veces sen sentido, que enchen o libro de ritmo e de musicalidade e facilitan a súa oralidade. Ademais, as ilustracións tamén resultan moi simpáticas, provocándonos a risa coas súas tolerías e os seus absurdos que, con todo, dentro do libro semellan a cousa máis lóxica do mundo. A aventura sorprendente dun homiño moi valente tamén é un libro estupendo para contar. E tanto pode ser ser contando nunha aula como nunha sesión de contacontos, porque é dos que enganchan o auditorio. Ás veces, as lecturas compartidas son aínda máis divertidas porque as risas se contaxian. Pero, logo, cada unha das nenas e dos nenos que o escoite quererá lelo de novo na súa casa, para volver a gozar das aventuras do homiño valente.

A avoa Encarna naceu e viviu coma un paxaro. Un día abriu as ás e saíu pola fiestra na procura dunha árbore onde facer un niño e ficar nel para sempre. Agora, cando canta a merla, todos sabemos que é a avoa Encarna quen nos fala para dicirnos que está aí, que nunca nos abandona.

A banda sen futuro reflicte a historia de Carlota, unha rapaza de dezaseis anos que debe facer amigos no seu instituto novo. Non é doado conseguilo e menos se unha ten o cabelo rapado ó cero e se sente como un ídem á esquerda. Carlota non entende por que os seus pais a obrigan a ir a clase. Só, Poch o cantante morto de Derribos Arias é quen de comprendela e manter longas conversas co ela desde a súa foto, aínda que non sempre lle dá a razón. Nestes meses Carlota descubrirá o amor e o desamor, e intentará pillar o ceo cos pés.

A boca do inferno é o misterio do que tratan as coplas do cego que un dia para na vila de Fontao na súa peregrinaxe a Compostela. A súa chegada pon en alerta a toda a poboación, en especial a certos fidalgos que temen ver descubertos os seus segredos e intrigas se, finalmente, ninguén lle impide ao cego cantar a súas historias. Obra teatral en dous actos, que aparece publicada por primeira vez tras ser representada con éxito polo grupo de teatro Trotaconventos.

A bruxa Perella é a máis traste de todo o país das bruxas. Un día, dando voltas e viravoltas no ceo, esfociña contra o chan e sáltanlle todos os dentes. ¿Que podemos facer cunha bruxa sen dentes?